佢外表威武，有尖牙利爪捕捉水中任何放得入囗嘅生物，又可以係溪流入面飛簷走壁，仲有堅硬嘅盔甲保護，但刀槍不入嘅大頭龜原來面臨緊重大威脅。
大頭龜分佈於高海拔山溪中，適應清涼嘅氣候，捕食水中嘅魚類及甲殼類動物為主，但發展郊野有機會令佢地嘅生存空間大大減少，例如渠道化、建屋及污染。
另外，龜類尤其罕見品種喺寵物及食品市場有一定嘅貿易需求，所以非法捕捉嘅行為十分之猖獗，不時喺香港嘅溪澗中仍會發現有人放置非法嘅龜籠。加上網上寵物交易平台亦不難發現有賣家販賣大頭龜，令執法難上加難。
現時大頭龜嘅保育狀況被定為瀕危物種(IUCN)及CITES內受保護物種，在本港亦受保護瀕危動植物物種條例及野生動物保護條例保護，管有大頭龜均需要申請瀕危物種公約管有許可證。所以切勿因一己私慾非法捕捉及在黑市購買，最重要當然是保護好生境，讓佢地可以係香港嘅山溪中繼續繁衍。
大頭龜/平胸龜/鷹嘴龜 Big-headed Turtle
Platysternon megalorcephalum